വരുണ്‍ ഗാന്ധിയെ കോണ്‍ഗ്രസിലേക്ക് ക്ഷണിച്ച്‌ അധീര്‍ രഞ്ജൻ ചൗധരി
വരുണ്‍ ഗാന്ധിയെ പാർട്ടിയിലേക്ക് ക്ഷണിച്ച്‌ കോണ്‍ഗ്രസിന്റെ മുതിർന്ന നേതാവ് അധീർ രഞ്ജൻ ചൗധരി. വരുണ്‍ ഗാന്ധി ശക്തനും കഴിവുള്ളവനുമാണെന്നും അദ്ദേഹം കോണ്‍ഗ്രസിനൊപ്പം ചേരണമെന്നും അദ്ദേഹം പറഞ്ഞു.
'അദ്ദേഹം കോണ്‍ഗ്രസില്‍ ചേരണം, പാർട്ടിയില്‍ ചേരുന്നതില്‍ ഞങ്ങള്‍ക്ക് സന്തോഷമേയുള്ളൂ. വരുണ്‍ വിദ്യാസമ്ബന്നനാണ്. അദ്ദേഹത്തിന് ക്ലീൻ ഇമേജ് ഉണ്ട്. ഗാന്ധി കുടുംബവുമായി ബന്ധമുള്ളതിനാലാണ് ബിജെപി അദ്ദേഹത്തിന് ടിക്കറ്റ് നിഷേധിച്ചത്. അദ്ദേഹം കോണ്‍ഗ്രസിലേക്ക് വരണമെന്ന് താൻ കരുതുന്നു' എന്നും അധീർ രഞ്ജൻ ചൗധരി പറഞ്ഞു.
ഉത്തർപ്രദേശിലെ പിലിഭിത്തില്‍ നിന്നുള്ള ബിജെപിയുടെ സിറ്റിംഗ് എംപിയാണ് വരുണ്‍. എന്നാല്‍ ഇത്തവണ അദ്ദേഹത്തിന് ബിജെപി ടിക്കറ്റ് നല്‍കിയിരുന്നില്ല. ഇതിന് പിന്നാലെയാണ് കോണ്‍ഗ്രസിൻ്റെ ഓഫർ.
