വെറുതെ ഒരു പ്രണയ മനസ്സ് ; കവിത , റോയ് പഞ്ഞിക്കാരൻ
നീയെന്നുമെൻ മിണ്ടാത്ത വെങ്കല പ്രതിമ പോലെ.
ഒരു മുളം തണ്ടിൽ ഒഴുകാത്ത
രാഗങ്ങൾ പോലെ .
കവിതാ ശകലങ്ങൾ മാനത്തുലയുമ്പോൾ
വിളർത്തു തളരുന്നതെന്തിന് നീ ?
ഒന്നോർക്കൂ , സഫലാകാത്ത മോഹങ്ങളുണ്ടീ
ഭൂമിയിൽ !
കണ്ണീരു ചോരയായി കവിളത്തു
ചാലുകൾ തീർക്കുമ്പോഴും
കല്ലെറിയുന്നതു കാരുണ്യമോ
അതോ,
കനിവ് കാട്ടുന്നതോ പ്രണയം ?
അതോ കമനീയതയുടെ താമര മൊട്ടിൽ
കാർമുകിൽ ഒളിച്ചു നിൽക്കുന്നതോ?
അറിയില്ലാ എനിക്ക്
ഒരു കുളിർ കാറ്റായി
ഒരു പൂനിലാവായി നിന്നിലലിയാൻ.
എങ്കിലും ഓർമയുടെ ഇതളുകൾ
വിരിയാനായി കല്ലോലിനിയുടെ
കരയിൽ കാത്തിരിക്കും ഞാൻ .
റോയ് പഞ്ഞിക്കാരൻ